அமெரிக்காவில் உடல் பருமன் கொண்ட 12 வயதுக்குட்பட்ட குழந்தைகளுக்கு எடை குறைப்பு மருந்துகள் பரிந்துரைக்கப்படுவது, 2019ஆம் ஆண்டுடன் ஒப்பிடுகையில் 300 மடங்குக்கும் அதிகமாக அதிகரித்துள்ளதாக புதிய ஆய்வொன்று தெரிவித்துள்ளது.
‘Pediatrics’ மருத்துவ இதழில் வெளியிடப்பட்ட இந்த ஆய்வில், நீரிழிவு நோய் இல்லாத, 8 முதல் 11 வயதுக்குட்பட்ட உடல் பருமன் கொண்ட 35 இலட்சத்துக்கும் அதிகமான குழந்தைகளின் மருத்துவப் பதிவுகள் ஆய்வு செய்யப்பட்டுள்ளன.
இதன்படி, இவ்வகை மருந்துகளுக்கான பரிந்துரைகள் 2019ஆம் ஆண்டில் 0.03 சதவீதமாக இருந்த நிலையில், இந்த ஆண்டு ஜூன் மாதத்துக்குள் 9.3 சதவீதமாக அதிகரித்துள்ளது.
இந்த மருந்துகளை 12 வயதுக்குட்பட்ட குழந்தைகளுக்கு உடல் எடை குறைப்புக்காகப் பயன்படுத்த அமெரிக்காவில் அதிகாரப்பூர்வமாக அனுமதி வழங்கப்படவில்லை.
எனினும், குறிப்பிட்ட மருத்துவச் சூழ்நிலைகளில், 8 வயது முதல் குழந்தைகளின் உடல் பருமனுக்குச் சிகிச்சையளிக்க இவ்வகை மருந்துகளைப் பயன்படுத்த மருத்துவ வழிகாட்டுதல்கள் அனுமதிக்கின்றன.
ஆய்வில் மருந்துகள் பரிந்துரைக்கப்பட்ட குழந்தைகளில் 94 சதவீதம் பேருக்கு கடுமையான உடல் பருமன் இருந்ததாகத் தெரிவிக்கப்பட்டுள்ளது. மேலும், சுமார் 65 சதவீதம் பேருக்கு அதிக கொழுப்பு, உயர் இரத்த அழுத்தம், தூக்கத்தில் மூச்சுத்திணறல் உள்ளிட்ட குறைந்தது ஒரு உடல்நலப் பிரச்சினை இருந்ததும் கண்டறியப்பட்டுள்ளது.
ஆய்வுக் காலத்தில் மொத்தம் 20,282 குழந்தைகள் இவ்வாறான மருந்துகளைப் பெற்றுள்ளனர்.
மேலும், அதிக வருமானம் கொண்ட சமூகங்களைச் சேர்ந்த குழந்தைகளுக்கு இவ்வகை மருந்துகள் பரிந்துரைக்கப்படுவதற்கான வாய்ப்பு 55 சதவீதம் அதிகமாக இருப்பதும் ஆய்வில் கண்டறியப்பட்டுள்ளது.
இதன் மூலம், குழந்தைகளின் உடல் பருமனுக்கான நவீன சிகிச்சைகளைப் பெறுவதில் சமூக மற்றும் பொருளாதார அடிப்படையிலான வேறுபாடுகள் உருவாகக்கூடும் என ஆய்வாளர்கள் சுட்டிக்காட்டியுள்ளனர்.
0 comments:
Post a Comment